人愈大，愈少用屋企電話黎傾電話
今日星期日，約左一班朋友去旺角新之城間Neway唱Lunch K。點知成班人都到齊，唯獨Karen遲遲未見人! 攪到我地班人都開始燥燥地，打佢手機無人聽，Whatsapp佢又無反應，眼看咩方法都用過哂，阿雯突然講左一句:『係咪未起身呀? 打去佢屋企問問啦!』
點知大家你眼望我眼，計返相識既日子，我諗我地都識左超過三年，竟然無人知Karen屋企電話係咩，我地只可以打佢『手機』同『Whatsapp』搵對方，連SMS都無咩意識去用。
諗深一層，我有幾耐無用屋企部電話黎煲電話粥呢? 唔好話煲電話粥，同朋友傾計既次數我諗近幾年黎十隻手指都數得哂。講起以前，手提電話都仲未普及，更加唔好講電腦。
個陣放左學無咩野做，唯一娛樂就係同朋友煲電話粥同睇電視，果個時期好多人屋企部電話都係得一條線，當我傾緊電話時，其他人係打唔通入黎，就因為咁成日比阿媽罵鬼死我，所以以前好珍惜傾電話既日子。
『喂，唔該搵沈佳宜丫!』
以前打電話比女神，如果唔係女神聽既話，必須先過佢屋企人果一個關。人地個阿媽就會問:『你係沈佳宜既同學仔呀? 其實呢 讀書時期，就要做好學生本份，傾電話呢......(下刪一萬字)』。
個陣成日都比伯母訓話，但又唔可以收線，只好內心祈禱女神會係背後大叫:『媽咪呀! 攞返電話黎!』黎救我。
我同女神就好似愛情小說入面既悲情男女主角咁，全世界都反對我地，我地要偷偷摸摸咁愛，唔係，係偷偷摸摸咁傾電話先岩，一路傾電話，雙方既父母都會係身邊埋怨:『傾夠未呀? 讀書又唔見你咁勤力!』
然後我地都會回應:『傾多一分鐘!』又或者:『我地傾緊功課呀!』又或者:『......』
當全世界都反對我地既時侯，我地更加珍惜傾電話既每一分每一秒，什至走去廁所收埋自己黎傾電話
『Oh! jack!』，『Oh! Rose!』
最後學校家長日，對方就會無里頭咁話我同佢個女成日傾電話，無心向學，個陣都唔知好嬲定好笑。
除左愛情小說主角上身之外，後來電話多線功能開始普及，姐係俗稱『三line』。試過有一次，有個女同學打黎，係咁問我對沈佳宜有冇意思，又或者係咁問你鐘意邊個。年少無知既我，就同佢講:『講你聽都得! 你唔好話比人知喎!』，對方就會拍哂心口一定唔會話比人知，當我講左一句:『沈佳宜。』
對方就會即刻大笑:『出聲啦!沈佳宜!話左佢鐘意你架啦!哈哈哈!』
個刻先知對方用左三線打黎，除左尷尬之外，都係一個青春回憶，有時阿A用三線打比我，我又用三線打比阿B，阿B又用三線打比人，成班人係到傾電話真係幾特別，嘈到拆天!
但真係幾開心。之後，每次同一班同學仔傾電話個陣，大家都會暗地用阿爸阿媽手機打比對方，如果唔通既話......即係.....哈哈哈!
由於電腦仲未普及，手機又無錢買。個陣成日都好無聊咁亂咁打比班朋友仔，就算無話題都會拎住電話傾，一齊傾住睇電視，無聊唱下歌，最不可思議對方竟然係男仔，依家諗起真係好Gay，點解我以前可以成日同班男仔朋友煲電話粥而唔覺得Gay? 但依家諗起都覺得嘔心同抗拒呢?
科技進步，手機，電腦，溝通工具愈普及，用屋企電話黎傾計就愈少。
依家搵人都係打對方手機，好多時第一句都係單刀直入，連人地個全名都唔會叫，因為基本上打得去手機九成都係佢本人。
除左打比男/女朋友傾電話之外，都好少會煲電話粥，好多時都係一句起兩句止，再唔係就講句:『有咩Whatsapp傾啦!』
最後語言變成文字，人愈大愈變得沉默。
說話技巧漸漸退步，但打字速度卻每日進步。
ICQ，MSN，屋企電話，Which next?
PS: 你地用屋企電話經歷又係點呢? 我很有興趣回味，不妨分享下。
Search